Космонавтика кунне халалласа Ярмушкари  вăтам шкулта сахал мар мероприяти иртрĕ. 5 класра чăваш чĕлхи урокне те Елена Николаевна вĕрентекен ытти чухнехинчен урăхларах йĕркелерĕ. «Çĕнĕ сăмахсем (неологизмсем)» темăна урокра космоспа та çыхăнтарчĕç. Космос тĕнчине çĕнĕ сăмахсемсĕр палăртаймăн та!              

    Ю.А.Гагарин паттăрлăхне аса илсе ачасем илемлĕ предложенисем йĕркелерĕç, чи ăнăçлисене суйласа тетрадь çине куçарчĕç. Чăваш çĕрĕ çитĕнтернĕ А.Николаев, М.Манаров, Н.Бударин ячĕсемпе мăнаçланчĕç пиллĕкмĕшсем, космос паттăрĕсене халалланă кĕнекесемпе паллашрĕç, презентаци те пăхрĕç, вĕрентекен ыйтăвĕсене хуравларĕç.

           «Пĕлмелли нумай…Тата пире А.Г.Николаев та, Ю.А.Гагарин та пирĕн пекех ял ачи пулни савăнтарчĕ. Тен, пиртен хăшĕ те пулсан космонавт пулĕ, хальлĕхе лайăх вĕренмелле, сывлăха çирĕплетмелле…», - пĕтĕмлетрĕç маттур ачасем.